Khmerrean.com

Tel: 093 561625

Working: 8.00 AM - 5.00 PM

មេរៀនទី១០៖គុណវិបត្តិនៃគ្រឿងញៀន (មេរៀនសង្ខេប សំណួរ ចម្លើយ)

ជំពូកទី២ : វប្បធម៌សន្តិភាព

មេរៀនទី១០៖គុណវិបត្តិនៃគ្រឿងញៀន

មេរៀនសង្ខេប

១- គ្រឿងញៀន

គ្រឿងញៀន ត្រូវបានកំណត់ថាជា «សារធាតុទាំងឡាយណាដែលបានចូលទៅក្នុង​រាងកាយ ហើយធ្វើឲ្យមានការផ្លាស់ប្ដូរមុខងារ ដំណើរការនៃរាងកាយ » ។ វាជាប្រភេទរុក្ខជាតិ ឬប្រភេទថ្នាំផ្សំឡើងពីសារធាតុគីមីច្រើនប្រភេទដូចជា អាភៀន កញ្ឆា និង​ថ្នាំញៀនសំយោគ​ផ្សេងទៀត ។ គ្រឿងញៀនមាន អ៊ិចស្តាស៊ី ឬថ្នាំគ្រវីក្បាល ហេរ៉ូអ៊ីន ម័រហ្វឺន អំហ្វេតាមីន ឬ យ៉ាម៉ា  យ៉ាបា ឬ ថ្នាំឆ្គួត មេតុំហ្វេតាមីន ឬទឹកកក កេតានី កាវហិត និងប្រភេទ​ថ្នាំ​ផ្សេងៗ​ទៀត​ដែលគ្មានស្លាកសញ្ញាពិតប្រាកដ ។ គ្រឿងញៀន មានច្រើនពណ៌ និងច្រើន​សណ្ឋាន​ដូចជា ប្រភេទថ្នាំទឹក «កាវ ប្រេងសម្រាប់លាយ» ថ្នាំចាក់ ថ្នាំគ្រាប់ ឬប្រភេទម្ស៉ៅ ។ល។

២- ចំណេះដឹងជាមូលដ្ឋាននៃគ្រឿងញៀន

គ្រឿងញៀន មានផលប៉ះពាល់យ៉ាងធ្ងន់ធ្ងរដល់ប្រព័ន្ធសរសៃប្រសាទ​របស់​អ្នកប្រើប្រាស់ ។ ក្រោយពេលប្រើ (ជក់ ហិត លេប ចាក់) វាធ្វើឲ្យអ្នកប្រើមានកម្លាំង និង​ងងុយដេក មិនឃ្លាន មានអារម្មណ៍រីករាយ បង្កើនភាពក្លាហាន ដែលជាហេតុ​ធ្វើឲ្យ​អ្នកប្រើ​យល់ថា គ្រឿងញៀន នឹងជួយបន្ធូសេចក្ដីទុក្ខសោករបស់គេ ។ ប្រសិទ្ធភាពនៃគ្រឿងញៀន អាចកើតមានក្នុងរយៈពេលពី ៤ ទៅ ៦ម៉ោងប៉ុណ្ណោះ ។ ការប្រើប្រាស់គ្រឿងញៀន នឹងបង្កឲ្យមានផលប៉ះពាល់ធ្ងន់ធ្ងរដល់សុខភាពផ្លូវកាយ និងផ្លូវចិត្ត ។

1-រោគសញ្ញាផ្លូវកាយ 

រោគសញ្ញាផ្លូវកាយមានដូចខាងក្រោម ៖

  • បំផ្លាញសរសៃឈាមតូចៗនៅក្នុងខួរក្បាល និងបេះដូង
  • មានជម្ងឺបេះដូង (លោតញាប់ ដើរមិនទៀង រលាកជាលិកា)
  • សម្ពាធឈាមឡើងខ្ពស់
  • ជម្ងឺរលាក និងស្ទះសរសៃឈាម
  • ជីបចរ ដើរញាប់ តែមិនទៀងទាត់ កម្ដៅក្នុងខ្លួនកើនឡើង និងបែកញើស
  • ស្ងួតមាត់ និងសង្កៀតធ្មេញ
  • ប្រស្រីភ្នែករីក កើតបូសស្បែក
  • ចុះស្គមជាខ្លាំង
  • មានការកន្រ្តាក់សាច់ដុំ
  • ដង្កូវស៊ីធ្មេញ និងពុកធ្មេញ
  • រសាប់រសល់ ពិបាកអង្គុយស្ងៀម ប្រកាច់ ធ្វើទុក្ខ និងស្លាប់

2-រោគសញ្ញាផ្លូវចិត្ត

  • ច្របូកច្របល់ក្នុងចិត្ត គិតផ្ដេសផ្ដាស (ភាំង)
  • បែកអារម្មណ៍ឆាប់ភ័យស្លន់ស្លោគិតអ្វីមិនទាន់
  • វង្វេងវង្វាន់ ចេះតែសង្ស័យអ្នកដទៃ
  • អារម្មណ៍អណ្ដែតអណ្ដូង
  • ឆាប់ខឹងមួរម៉ៅច្រឡោត
  • បាត់បង់ការស្រេកឃ្លាន

៣-មូលហេតុនៃការប្រើប្រាស់គ្រឿងញឿន 

  • ចង់ដឹង ចង់សាកអ្វីដែលប្លែកថ្មី ឬចង់ដឹងអ្វីដែលខ្លួនមិនដឹង
  • ត្រូវគេអូសទាញក្នុងក្រុមដែលគេសេពគប់
  • គិតថាអាចបំភ្លេចបញ្ហាផ្សេងៗដែលកើតមាន (ក្នុងគ្រួសារ ផ្ទាល់ខ្លួន) អផ្សុក គ្មានការងារធ្វើ
  • គិតមានអារម្មណ៍ហ៊ានជាងពេលមុន
  • ព្យាយាមបំបាត់ភាពបរាជ័យរបស់ខ្លួនកន្លងមក
  • ចង់សប្បាយដើម្បីបញ្ចៀសការធុញទ្រាន់ក្នុងជីវិត
  • ទទួលការកៀបសង្កត់ពីនរណាម្នាក់
  • យល់ថាជាថ្នាំព្យាបាល បន្ថយការឈឺចុកចាប់

៤- ផលអាក្រក់នៃការប្រើប្រាស់គ្រឿងញៀន  

  • ចំពោះខ្លួនឯង ៖ បន្ថយចំណង់ក្នុងការបរិភោគអាហារ និងដំណេក ខ្លួន​ប្រាណចុះស្គម ប្រកាច់មិនអាចគ្រប់គ្រងខ្លួនឯងបាន ។ វាបានបំផ្លាញទ្រព្យសម្បត្តិ ខាតពេលរៀនសូត្រ គ្មានការងារធ្វើ ធ្លាក់ខ្លួនក្រ សង្គមស្អប់ខ្ពើម ងាយឆ្លងរោគពិសេស​រោគអេដស៍ តាមរយៈការប្រើស៊ីរ៉ាំង ឬម្ជុររួមគ្នា បាត់តម្លៃផ្ទាល់ខ្លួន បាត់ភាពម្ចាស់ការ​ចំពោះគ្រួសារ ។
  • ចំពោះគ្រួសារ ៖ បាត់បង់កិត្តិយស ពិបាកចិត្ត ដោយសារតែ​សមាជិក​គ្រួសារ​ណាម្នាក់​ពិសេសកូនបានប្រើប្រាស់គ្រឿងញៀន។ មានអំពើហិង្សា ជួនកាលម្តាយឪពុក​វាយដំកូន ឬកូនប្រើអំពើហិង្សាមកលើម្ដាយឪពុក ។ គ្រួសារ ខាតបង់ទ្រព្យសម្បត្តិ សុភមង្គល និងអំពើអវិជ្ជមានជាច្រើនទៀត ។
  • ចំពោះសង្គម ៖ អនាធិបតេយ្យ ក្នុងសង្គម ដូចជាចោរកម្ម ឧក្រិដ្ឋកម្ម ក្រុម​ក្មេងអន្ធពាល បងតូច បងធំ ជួញដូរមនុស្ស បាត់បង់ធនធានមនុស្ស បាត់បង់​កំណើន​សេដ្ឋកិច្ចជាតិ សង្គមគ្មានការអភិវឌ្ឍ ។

៥- វិធីសំខាន់ៗក្នុងការចៀសវាងគ្រឿងញៀន

  • កុំសាកល្បងប្រើគ្រឿងញៀន សូម្បីតែម្ដងក៏ដោយ
  • មិនត្រូវជឿតាមការញោះញង់របស់ឈ្មួញលក់គ្រឿងញៀន ឬអ្នកញៀនឡើយ
  • បើមានគេបបួល ត្រូវនិយាយពាក្យថា «ទេ»
  • បដិសេធ ដោយមិនប្រព្រឹត្តគ្រឿងញៀនជាដាច់ខាត
  • មិនសេពគប់ជាមួយអ្នកញៀន
  • ផ្ដល់ព័ត៌មានដល់អាជ្ញាធរមានសមត្ថកិច្ច នៅពេលជនដែលចែកចាយ ឬ ប្រើគ្រឿងញៀនជនដែលប្រព្រឹត្តគ្រឿងញៀន នឹងត្រូវផ្ដន្ទាទោសពី 1ដល់ 5ឆ្នាំ ។ 

    សំណួរ

    1. ដូចម្ដេចដែលហៅថា គ្រឿងញៀន ? តើគ្រឿងញៀន មានប្រភេទអ្វីខ្លះ ?
    2. តើមានមូលហេតុអ្វីខ្លះ ដែលបណ្ដាលឲ្យជនខ្លះប្រើប្រាស់គ្រឿងញៀន ?
    3. តើអ្នកប្រព្រឹត្តគ្រឿងញៀន មានផលប៉ះពាល់អ្វីដល់ខ្លួន គ្រួសារ និង​សង្គម​ជាតិ?
    4. ចូរធ្វើផ្ទាំងរូបភាពស្ដីពីយុទ្ធនាការប្រឆាំងនឹងគ្រឿងញៀន ដោយប្រើគំនិត​ផ្ទាល់ខ្លួន ?
    5. ប្រសិនបើមាននរណាម្នាក់បង្ខំអ្នកប្រើប្រាស់គ្រឿងញៀន តើអ្នកមានវិធីបដិសេដដូចម្តេច ?
    6. តើជនដែលប្រព្រឹត្តគ្រឿងញៀន នឹងត្រូវមានទោសដូចម្ដេចខ្លះ ?

វាយតម្លៃ ផ្តល់មតិយោបល់ ដើម្បីយើងខ្ញុំធ្វើការកែលម្អ។

សូម ចុះឈ្មោះ ដើម្បីផ្តល់មតិយោបល់
ចុះឈ្មោះ: 1