ជំពូកទី៦៖ ការវិវត្តនៃភាវរស់ , មេរៀនទី២៖ ភស្តុតាងនៃការវិវត្ត

ជំពូកទី៦៖ ការវិវត្តនៃភាវរស់

មេរៀនទី២៖ ភស្តុតាងនៃការវិវត្ត

មេរៀនសង្ខេប

• ផូស៊ីល ការលូតលាស់អំប្រ៊ីយ៉ុងនិងទម្រង់ដូចគ្នានៃសារពាង្គកាយ ជាភស្តុតាងបញ្ជាក់ថាភាវៈរស់វិវត្ត ។
• .ផូស៊ីលបង្ហាញថា ភាវៈរស់សម័យមុនមានលក្ខណៈខុសគ្នាអំពីភាវៈរស់សព្វថ្ងៃ ។
• ក្នុងដំណាក់លូតលាស់ដំបូង អំប្រ៊ីយ៉ុងនៃថ្នាក់ទាំងប្រាំរបស់សត្វឆ្អឹងកងមានលក្ខណៈដូចគ្នា( រូបរាង វត្តមានកន្ទុយ រង្វះស្រកីនៅសងខាងដើមក) ។ ត្រង់នេះបញ្ជាក់ថា គ្រប់ប្រភេទនៃសត្វឆ្អឹងកងមានបុព្វសត្វរួមតែមួយ ។
• សត្វឆ្អឹងកងទាំងអស់មានរូបផ្គុំក្នុងដូចគ្នា ( គ្រោងឆ្អឹងក្នុងនិងមានឆ្អឹងកង) ។ ស្លាបបក្សី ព្រុយដូហ្វាំងដៃមនុស្សមានរូបរាងនិងនាទីខុសគ្នាតែមានរូបផ្គុំក្នុងដូចគ្នា ស្លាបបក្សី ព្រុយដូហ្វាំងនិងដៃមនុស្សជាសរីរាង្គអូម៉ូឡូក ។ សរីរាង្គអូម៉ូឡូក ជាសរីរាង្គដែលមាននាទីខុសគ្នាតែមានរូបផ្តុំនៅក្នុងប្លង់តែមួយ ដូច្នេះ វាមានប្រភពតែមួយក្នុងដំណាក់ជាអំប្រ៊ីយ៉ុង ។
• អ្នកវិទ្យាសាស្ត្រធ្វើការប្រៀបធៀប ម៉ូលេគុល ADN និងម៉ូលេគុលប្រូតេអ៊ីននៃប្រភេទផ្សេងៗដើម្បីកំណត់រកទំនាក់ទំនងសែស្រឡាយរវាងប្រភេទភាវៈរស់ផ្សេងៗ ។ ភាវៈរស់ដែលមានទំនាក់ទំនងសែស្រឡាយជិត តែងតែមានតំណលំដាប់នុយក្លេអូទី ក្នុងម៉ូលេគុលADN និងតំណលំដាប់អាស៊ីតអាមីណេក្នុងម៉ូលេគុលប្រូតេអ៊ីនដូចគ្នាភាគច្រើន ។
• ប្រភេទថ្មីមួយកើតឡើង នៅពេលដែលពពួកមួយត្រូវបែកចេញពីពពួកមួយផ្សេងៗទៀតក្នុងប្រភេទរបស់វា ។ ការបែកចេញរយៈពេលដ៏យូរធ្វើឱ្យលក្ខណះរបស់វាមានការវិវត្ត ។

សំណួរ

• តើភស្តុតាងអ្វីខ្លះ៖ដែលបញ្ជាក់ថាភាវៈរស់វិវត្ត?
• តើការសង្កេតពីការលូតលាស់អំប្រ៊ីយ៉ុងនៃសត្វឆ្អឹងកងផ្សេងៗនៅដំណាក់កាលដំបូង នាំអោយយើងសន្និដ្ឋានដូចម្ដេចដែរ ?
• ដូចម្ដេចដែលហៅថា សរីរាង្គអូម៉ូឡូក ?
• ចូរឱ្យឧទាហរណ៍អំពីសរីរាង្គអូម៉ូឡូក ។

ប្រភព៖ សៀវភៅសិក្សាគោលជីវវិទ្យាថ្នាក់ទី១២ សៀវភៅកំណែជីវវិទ្យាថ្នាក់ទី១២